Djúpavogshreppur
A A

Út um allt - Kristjana Stefáns og Svavar Knútur í Löngubúð

Út um allt - Kristjana Stefáns og Svavar Knútur í Löngubúð
14 Jul
21:00

Út um allt - Kristjana Stefáns og Svavar Knútur í Löngubúð

Bonnie og Clyde íslenska söngvaskáldabransans, þau Svavar Knútur og Kristjana Stefáns hyggjast þeysast um landið í júlí næstkomandi á sinni árlegu sumartónleikaferð.
Kristjana og Svavar Knútur munu á ferð sinni heimsækja alla helstu landsfjórðungana og kynda undir sumarfiðringi landans með húmor og hlýju, krúttlegum kvöldsöngvum, angurværum Abbalögum og sígildum söngperlum. Þá munu sagðar sögur, lesin ljóð og klassísk íslensk kvöldvökustemmning höfð í hávegum.

Svavar Knútur á stóran ættgarð austur á fjörðum og sérstaklega kringum Djúpavog, en móðurafi hans fæddist í Álftafirðinum. Djúpivogur er líka eitt fegursta bæjarfélag Íslands, víðfrægt fyrir afslappað mannlíf, náttúrufegurð og góða stemmningu. Því er alveg tilvalið að sækja Djúpavogsbúa heim í Löngubúð á sunnudagskvöldi.

Kristjana og Svavar hafa síðan 2008 haft unun af því að syngja saman dúetta og komið fram víða um land við gríðargóðar undirtektir. Þau gáfu út dúettaplötuna Glæður árið 2011 sem er löngu uppseld hjá útgefanda.

Miðasala á www.tix.is. Miðaverð er kr. 4.000 og frítt fyrir börn 14 ára og yngri