Hlaðvarp

Dagar myrkurs 2020 eru 28. október – 1.nóvember. Í ljósi aðstæðna verður þessi 20 ára gamla hátíð á Austurlandi ekki með hefðbundnu sniði í ár. Í stað þess þó að morkna úr leiðindum og tilbreytingarleysi hugsum við í lausnum. Við gerum okkur glaðan dag með því að hlusta á skemmtilegar sögur, rifja upp gamla tíma, hræðast yfir drungalegum frásögnum og hlusta á þjóðsögur með hlaðvarpsþáttum sem teknir hafa verið saman fyrir þetta tilefni. Enn er öllum velkomið að senda inn efni í hlaðvarpsbankann og má það berast til greta.samuelsdottir@mulathing.is, einnig má hafa samband í síma 697-5853.

Allra heilagra messa

Allra heilagra messan er 1. nóvember. Alla jafna er hún hluti af dagskrá Daga myrkurs en í þetta sinn verður henni streymt á netinu, hlaðið inn á hlaðvarpið og útvarpað á FM 100,2. Fólk er hvatt til að kveikja á kerti við kirkjuna. Alfreð Finnsson prestur á Djúpavogi stýrir athöfninni.

Frásagnir Kristins Guðmundssonar frá Þvottá

Dagbjört Guðmundsdóttir frá Þvottá í Álftafirði les tvær frásagnir afa síns Kristins Guðmundssonar. Frásagnirnar eru hrakningasögur af Kristni, systkinum hans og sveitungum og því tilvalið efni fyrir Daga myrkurs.

Arnoddarurð

Halldóra Dröfn segir frá Arnoddarurð í Stöðvarfirði

Hugleiðing

Hugleiðing frá Alfreð Finnssyni presti á Djúpavogi

Á Sprengisandi

Á Sprengisandi flutt í samsöng í Djúpavogsskóla 1. - 4. bekkur. Kórstjóri er Ilona Laido.

Djákninn á Myrká

Alfreð Finnson prestur segir söguna um Djákninn á Myrká.

Vofan í Markúsarseli

Vofan í Markúsarseli. Saga úr bókinni Heyrt og munað – endurminningar Guðmundar Eyjólfssonar frá Þvottá. Íris Birgisdóttir les.

Skála-Brandur

Berlind Einarsdóttir les um Skála-Brand upp úr bókinni Dvergasteinn: Þjóðsögur og sagnir úr Djú́pavogshreppi eftir Öldu Snæbjörnsdóttur.

Sviðahausar

Sviðamessu drengirnir sameinast á ný eftir alltof langa fjarveru. Gunnar Sigvalda, Skúli Andrésar og Hallur Ásgeirs láta ljós sitt skína af gömlum vana og nú í formi hlaðvarps fyrir Daga myrkurs á Djúpavogi. Engu er til sparað, engum er hlíft og ekkert meikar sens.

Faðirvorahlaupið

Faðirvorahlaupið er einn af föstum viðburðum Djúpavogs á Dögum myrkurs. Nafn hlaupsins á sér skemmtilega sögu og fyrirmynd þess líka. Stefán Jónsson rithöfundur, alþingismaður og útvarpsmaður lýsti því í bók sinni Að breyta fjalli þegar hann hljóp frá Teigarhorni heim til sín í Rjóður og gerði það á þremur faðivorum, teygðum. Hér heyrum við Írisi Birgisdóttur lesa hluta úr bók Stefáns Jónssonar þar sem þessu er lýst.

Sigurður Ægisson og Traustavísur

Sigurður Ægisson var starfandi prestur 1985-1989 á Djúpavogi og hóf hér sinn prestskap. Hér leið honum alltaf vel og í Sigurði á Djúpivogur sterk ítök ennþá. Í þessum hlaðvarpsþætti tekur Sigurður saman nokkrar Traustavísur ásamt tilurð þeirra eftir því sem best er vitað. Sigurður er nú prestur á Siglufirði og hefur verið síðastliðin 19 ár. Ef þið viljið hafa samband við hann er hægt að finna hann í símaskránni þar og einnig senda honum póst sae@sae.is