Djúpavogshreppur
A A

Leikskóli

Desemberdagar í Bjarkatúni

Hefðbundið vetrarstarf fór í jólafrí í byrjun desember.  Það var samt ekki setið auðum höndum í desember heldur hafa krakkarnir brallað ýmsilegt.  Við fórum til dæmis alla miðvikudaga í vöfflukaffi í Tryggvabúð með hóp af báðum deildum.  Þetta tókst vel og vakti lukku meðal barnanna.  Sjá myndir frá vöfflukaffinu hér.   

Í vöfflukaffi

Þá voru bakaðar piparkökur og boðið í piparkökukaffi.  Börnin bökuðu og skreyttu sínar eigin piparkökur sem þau síðan buðu gestum sínum.  Myndir af piparkökubakstri eru hér og úr piparkökukaffinu hér

Úr piparkökubakstrinum

Þá bjuggu börnin til jólaskraut sem þau fóru með heim til að setja upp um jólin.  Það var leikið sér og farið í val á hverjum degi en þá ákveður þjónn dagsins hvað eigi að leika með þann daginn og börnin velja sér síðan hvert þau vilja fara eftir því hvað er í boði.  Þau mega síðan skipta um svæði og fara að leika með eitthvað annað.  Sjá má myndir frá því hér.

Jólastjarnan máluð

Jólatréð málað

Við héldum líka lítið jólaball og sáu elstu nemendur leikskólans um að skreyta tréð.  Sjá myndir af skreytingunni hér.  Dansað var í kringum jólatréð og eins og venja er á jólaböllum þá kom jólasveinn í heimsókn.  Nokkur börn voru mjög hrædd við þennan skrítna mann í rauðum fötum og með mikið skegg.  Þau héldu sig því til hlés á meðan kallinn dansaði í kringum jólatréð.  En hann var ótrúlega fyndinn og skemmtilegur þannig að þegar kom að því að gefa krökkunum pakka þá voru öll börnin búin að ná hræðslunni úr sér og tóku glöð við pakka frá jólasveininum.  Myndir af jólaballinu eru hér

Dansað í kringum jólatréð

Þegar nær dró jólum fengum snjó sem var heldur betur ánægjulegt og fengu börnin að kíkja aðeins út á pall til að athuga hvort snjórinn hafi eitthvað breyst eftir sumarfríið.  Það var ekki en þeim fannst rosalega gaman að hlaupa um á pallinum.  Loksins kom snjór-myndir hér.

Hlaupið í snjónum

Síðasti opnunardagur leikskólans þetta árið er þorláksmessa og voru nokkur börn sem nýttu sér það að koma í leikskólann. 

Róleg stund á þorláksmessu. 

 

Við óskum ykkur gleðilegra jóla

ÞS

 

 

 

Leikskólakennari

Leikskólinn Bjarkatún auglýsir eftir leikskólakennara til starfa. Starfið er laust frá 1. janúar 2017. Nánari upplýsingar gefur leikskólastjóri í síma 470-8720 og gudrun@djupivogur.is.

Generalprufa árshátíðar 2016

Djúpavogsskóli setti upp leikritið Dýrin í Hálsaskógi.  Tjaldahópi (elstu börn leikskólans) var boðið á generalprufuna og höfðu börnin þetta að segja um sýninguna:

  • Rosalega skemmtilegt leikrit
  • Fyndnast var þegar Bangsapabbi öskraði á Mikka ref af því hann hafði borðað svínslæri
  • Lilli klifurmús var svo sniðugur að klifra upp í tréð
  • Húsamýsnar voru lang skemmtilegastar
  • Það var fyndið þegar bangsastrákarnir fóru í baðið
  • Síðan voru auðvitað systkinin langflottust en líka allar frænkurnar og frændurnir í leikritinu

 

Myndirnar sem hér birtast eru teknar af nemendum Tjaldahóps

 

Árshátíð grunnskólans 2016

Minni á árshátíð grunnskólans á morgun, föstudaginn 4. nóvember.  Auglýsingin er hér.

Við litum eldsnöggt við á æfingu í dag og eins og sjá má á meðfylgjandi myndbandi þá verður þetta ekkert smá flott!

Skólastjóri

 

 

 

 

 

 

 

Vetri fagnað 2016

Í leikskólanum fögnum við alltaf því að veturinn sé að koma.  Það gerðum við á föstudeginum fyrir fyrsta vetrardag sem var á laugardegi.  Við héldum diskótek og buðum 4. og 5. bekk grunnskólans til að fagna þessu með okkur.  Allir fengu svo köku eftir diskóið.  Allir skemmtu sér vel og voru óskalögin mörg og dansstílarnir fjölbreyttir. 


Fleiri myndir hér

ÞS

Bleikur dagur í leikskólanum

Við héldum bleikan dag þann 14. október sl. í leikskólanum þar sem allir nemendurnir og starfsfólk mætti í einhverju bleiku, mismiklu þó.  Við hittumst svo í salnum og lékum okkur og dönsuðum með bleikar blöðrur. 

Fleiri myndir hér

ÞS

28.10.2016

Kvennafrí í dag kl. 14:38 - tilkynning frá Djúpavogsskóla

Vegna kjarabaráttu kvenna munu konur í Djúpavogsskóla leggja niður störf kl. 14:38 í dag, mánudaginn 24. október.

Af því tilefni biðjum við forráðamenn að gera ráðstafanir og sjá til þess að búið verði að sækja börnin í grunn- og leikskóla fyrir þann tíma.

Sjá nánar um kvennafrídaginn hér.

Skólastjórar Djúpavogsskóla.

 

 

Skólastarf Bjarkatúns

Hægt er að sjá skólastarf Kríudeildar með því að smella á myndina og síðan er hægt að prenta hana út og hengja í ísskápinn.  Hóparnir eru aldurshreinir og er einum hópi (2013) skipt í tvennt í ákveðnu starfi.  

ÞS

20.10.2016

Laust starf í Tryggvabúð

Djúpavogshreppur auglýsir 50 % starf í Tryggvabúð frá 1. október. Um er að ræða framtíðarstarf í félagsmiðstöð eldri borgara. 
Félagsmiðstöð eldri borgara í Tryggvabúð er staðsett að Markarlandi 2, Djúpavogi og er opin öllum þeim sem þangað vilja koma. 
Þar fer fram fjölbreytt félags- og tómstundastarf auk dagþjónustu fyrir eldri borgara

Helstu verkefni og ábyrgðarsvið starfsmanns 
• Umsjón með félagsstarfi í samvinnu við stjórn Félags eldri borgara í Djúpavogshreppi, félags- og tómstundanefnd og sveitarstjóra
• Matseld í hádegi, morgun- og síðdegiskaffi, þrif
• Viðkomandi veitir einstaklingum persónulega og einstaklingsmiðaða þjónustu

Við leitum að einstaklingi með
• þekkingu og reynslu af því að starfa með fólki
• skipulagshæfileika
• lipurð í mannlegum samskiptum
• hæfni til að sýna frumkvæði í starfi
• íslenskukunnáttu

Launakjör eru skv. kjarasamningi sveitarfélaga við viðkomandi félög.

Umsóknir skulu berast á skrifstofu sveitarfélagsins Bakka 1, 765 Djúpavogi, fyrir 29. september n.k. 

Umsóknareyðublöð má nálgast með því að smella hér.

Nánari upplýsingar veitir undirritaður í s. 843-9889 og á netfanginu sveitarstjori@djupivogur.is

Sveitarstjóri

Þroskaþjálfi í Djúpavogsskóla

Djúpavogsskóli auglýsir eftir þroskaþjálfa í 100% starf, sem kemur til með að vinna með fötluðum nemendum skólans í nánu samstarfi við umsjónarkennara. 

Djúpavogsskóli er lítill en vaxandi skóli.  Kennsla fer fram á þremur starfsstöðvum, grunnskóla með um 70 nemendur, leikskóla með tæplega 40 nemendur og tónskóla.  Mikið og gott samstarf er á milli allra skólastiga. Einnig er mjög gott samstarf við Umf. Neista en yfir 90% nemenda grunnskólans stunda æfingar hjá ungmennafélaginu og taka þær við strax að loknu skólastarfinu. 

Í Djúpavogsskóla er lögð mikil áhersla á umhverfismennt og átthagafræði og stendur nú yfir innleiðing á því að gera Djúpavogsskóla að Cittaslow skóla en Djúpavogshreppur varð aðili að Cittaslow hreyfingunni árið 2013. Djúpavogsskóli er Grænfánaskóli. 

Skólastjóri, Halldóra Dröfn Hafþórsdóttir veitir nánari upplýsingar áskolastjori@djupivogur.is eða í síma 470-8713.

Listsýning í Hálsaskógi

Skógarverkefnin eru nú komin upp en börnin á leikskólanum Bjarkatúni eru með listasýninguna “Skreytum skóginn” í Hálsaskógi, Skógrækt Djúpavogs. Þetta er 15 árið sem sett er upp sýning á vegum leikskólans í skóginum.

Listaverkin eru unnin úr fjölbreyttum efnivið, bæði endurvinnanlegum sem og náttúrulegu efni úr skóginum í anda Cittaslow.  Sniglar, fiðrildi og fuglar skíða og hanga um skóginn og hvetjum við alla að fara og skoða sýninguna sem stendur til 30. september.

Hér má skoða lítinn hluta af listaverkunum.

Guðrún leikskólastjóri

Kvenfélagið Vaka gefur gjöf

Á vordögum gaf Kvenfélagið Vaka okkur í leikskólanum Bjarkatúni höfðinglega gjöf, hluti að verðmætti 300.000,- . Við keyptum 55 tommu flatskjá með festingu svo hægt væri að festa hann upp inn í sal, 2 stór hjól, 3 sparkbíla og einn göngubíl.

Starfsfólk og börnin í Bjarkatúni þakka Kvenfélaginu Vöku alveg æðislega vel fyrir þessa flottu gjöf :)

GSS

 

 

 

 

 

Læsisstefna Bjarkatúns

Hér er læsisstefna Bjarkatúns, líka er hægt að lesa hana inn á skýrslur og áætlanir

Guðrún

08.06.2016

Málbeinaleit með Lubba

Rauði þráðurinn í öllum skipulögðum málörvunartímum í leikskólanum Bjarkatúni er hann Lubbi okkar. Þess vegna köllum við þetta starf Lubbastarf.  Lubbi er bangsi sem börnin kynnast strax í hópastarfi þegar þau eru 2ja ára gömul og hann fylgir þeim alveg út leikskólagönguna. Við vinnum með bókina Lubbi finnur málbein en sú bók er hugsuð til málörvunar og hljóðanáms fyrir börn á aldrinum tveggja til sjö ára. Höfundar bókarinnar, Þóra Másdóttir og Eyrún Ísfold Gísladóttir, eru talmeinafræðingar og hafa þær áralanga reynslu af talþjálfun barna. Efnið í bókinni stuðlar að auðugri orðaforða og ýtir undir skýrari framburð barna. Í bókinni er lögð rík áhersla á það að hverjum bókstaf fylgi málhljóð. Hvert málhljóð er tekið fyrir á síðu eða opnu. Hverju málhljóði fylgir ákveðin vísa og einnig stutt saga eftir Þórarin Eldjárn þar sem lögð er sérstök áhersla á hvert hljóð fyrir sig. Hvert málhljóð á sér ákveðið tákn en með því að tengja hljóðið við táknræna hreyfingu er auðveldara fyrir börnin að læra það og muna. Börnin í leikskólanum eru mjög hrifin af Lubba og það er einstaklega gaman og mikil forréttindi að fá að kenna þeim allt um heillandi heim íslenskunnar í gegnum þetta námsefni.

Við höfum alltaf gert eitthvað sérstakt með Lubba okkar í lok hvers skólaárs þegar hópastarfinu líkur. Núna í maí héldum við kveðjuviku fyrir Lubba þar sem allir Lubbahóparnir fóru með Lubba í gönguferð að leita af földum málbeinum uppá Bóndavörðu. Þessi leikur var unnin í samstarfi Lubbasmiðjuna sem bauð öllum leikskólanum á landinu að taka þátt. Við fórum uppá Bóndavörðu þar sem við sjáum yfir allan Djúpavog. Lubbi kom með okkur og við fórum í málhljóða sönggöngu á leiðinni að felustaðnum. Uppá Bóndavörðu voru falin beinin B fyrir Búlandstind og Bjarkatún og D fyrir Djúpavog sem börnin leituðu af og þar var mikil spenna. Einn hópurinn fékk ægilega þoku en það var einstaklega spennandi ganga þar sem hreindýrin vorum mjög nálægt okkur að fela sig í þokunni...og kannski að leita af málbeinum til að gæða sér? Þegar málbeinin voru síðan fundin sungum við lögin um stafina B og D og blésum sápukúlur yfir Djúpavoginn okkar. Málhljóða söngganga var síðan farin aftur niður í leikskóla og þar var leitað af fleiri málbeinum um alla leikskólalóðina og þá fékk hugmyndaflug barnanna að ráða ferðinni og þar var virkilega  gaman að sjá hvernig leikirnir þróuðust út frá aldri barnanna.

 
Hópur 2011 í málbeinaleit


Hópur 2012 á leið í málbeinaleit með Lubba


Hópur 2013 búinn að finna bein handa Lubba

 

Fleiri myndir eru hér

Bestu kveðjur úr leikskólanum

Hugrún og Lubbi

 

Síðasti dagur útikennsluviku

Í síðustu viku voru útikennsludagar í grunnskólanum.  Elstu nemendur leikskólans eru í heimsókn hjá okkur nú í tvær vikur og tóku þátt að miklu leyti.  Síðasta daginn fórum við öll saman í gönguferð út á sanda.  Alls um 65 nemendur grunnskólans, 9 nemendur leikskólans ásamt starfsfólki.

Við gengum sem leið lá eftir gamla veginum og þaðan út á sanda.  Þar fórum við í "Að hlaupa í skarðið" og í boðhlaup.  Eftir það gekk hópurinn út í Sandey og á leiðinni fundum við skeljar og margan fjársjóðinn, spiluðum fótbolta, létum öldurnar elta okkur o.m.fl.  Þegar við komum út í Sandey voru allir orðnir banhungraðir þannig að við fengum okkur nesti.  Síðan fórum við í feluleik, bjuggum til sandkastala, skoðuðum hellinn í Sandey og lékum okkur í frjálsum leik.  Þegar fór að líða að hádegi röltum við til baka og komum beint í hádegismat.

Veðrið hefði getað verið betra, það var pínu kalt en það kom ekki að sök.  Allir voru glaðir og sáttir og nutu þess að vera úti í náttúrunni í sátt og samlyndi við menn og dýr.

Myndir úr ferðalaginu má finna hér.

Skólastjóri

Gæsluvöllur sumarið 2016

Gæsluvöllur verður starfræktur í Bjarkatúni fyrir börn fædd 2009-2014 frá 18. júlí -12 . ágúst í sumar, ef næg þátttaka fæst og starfsfólk finnst. Miðað er við að ekki færri en 8 börn verði skráð í hverri viku. 

Opið verður frá kl. 10:00-14:00. Börnin þurfa að koma nestuð fyrir daginn en aðstaða verður í leikskólanum til að borða inni ef veður er vont.  Skrá verður börnin 1-4 ákveðnar vikur og er skráningin bindandi.  

Vikan kostar kr. 10.500, systkinaafsláttur er 50%.

Foreldrar eru vinsamlegast beðnir að ganga frá skráningu á skrifstofu sveitarfélagsins fyrir 1. júní þar sem fram kemur nafn barns/barna og hvaða vikur viðkomandi hyggst nýta sér.

Sveitarstjóri

Kennari / leiðbeinandi óskast

Kennari / leiðbeinandi óskast í leikskólann til starfa strax eða sem fyrst.

Í boði er skemmtileg vinna með skemmtilegu og góðu fólki í fallegu umhverfi.

Umsóknarfrestur er til 29. apríl. Laun eru skv. kjarasamningi viðkomandi stéttarfélags við launanefnd sveitarfélaga.

Allar nánari upplýsingar veitir leikskólastjóri – umsóknir sendist á netfangið bjarkatun@djupivogur.is eða sendist á skrifstofu leikskólastjóra að Hammersminni 15, 765 – Djúpivogur.

 

Guðrún S. Sigurðardóttir
leikskólastjóri

Leikrit miðvikudaginn 13.apríl

Brúðuleikrit

Brúðuheimar ætla að koma á Djúpavog miðvikudaginn 13. apríl og halda fyrir okkur brúðuleikritið Pétur og Úlfurinn. Leikritið verður klukkan 14:00-15:00 og er fyrir aldurinn 0-8 ára. Leikritið verður haldið út á Helgafelli og munu krakkar sem eru enn í leikskólanum og viðverunni fara með kennurum en börn sem eru hætt fyrr eða eru ekki í leikskólanum mæta með foreldrum sínum.

Þetta leikrit er sumargjöf til leikskóla barnanna í ár frá foreldrafélaginu og verða teknar ljósmyndir til minningar, sem þau munu fá á sumardaginn fyrsta.

 

Kær kveðja Foreldrafélag Djúpavogsskóla

11.04.2016

Djúpavogsskóli fær styrk fyrir innleiðingu Cittaslow

 

Þær gleðifréttir bárust okkur í Djúpavogsskóla þann 5. apríl s.l. að Sprotasjóður Mennta- og menningarráðuneytisins muni styrkja okkur um 2,1 milljónir króna við innleiðingu hugmyndafræði Cittaslow í skólana. Þessa önn hafa starfsmenn verið að undirbúa þetta spennandi þróunarstarf og verður styrkurinn til þess að auðvelda okkur að ýta verkefninu af stað með nemendum og að halda vel utan um verkefnið næsta vetur. Í rökstuðningi við gerð umsóknar segir m.a. ,,Hugmyndafræði Cittaslow fjallar um eina mikilvægustu þætti mannlífsins í dag, umhverfismál, náttúruvernd, samskipti, heilbrigt líferni og virðingu fyrir fjölbreytileika mannlífsins. Verkefnið leggur einnig áherslu á að efla nýsköpunar- og frumkvöðlamennt þar sem nemendum er hjálpað við að koma eigin hugviti í framkvæmd með það að markmiði að efla sjálfbært skapandi samfélag."

Sprotasjóði er ætlað að styðja við þróun og nýjungar í skólastarfi í leik- grunn- og framhaldsskólum landsins . Gaman er að geta þess að sótt var um styrki í sjóðinn að þessu sinni að upphæð rúmlega 300 mkr. en sjóðurinn hafði aðeins  um 60 mkr. til ráðstöfunar. Af þeim fengum við 2.1 milljón sem segir okkur að fleiri hafa trú á þessu verkefni en skólafólkið í Djúpavogsskóla, sem gefur okkur byr undir báða vængi. Frétt og lýsing á þróunarverkefninu er í Bóndavörðunni sem kom út í vikunni.

Þar sem verkefnið mun teygja anga sína víða inn í samfélagið og hafa þannig jákvæð áhrif á einstaklinga, hópa og fyrirtæki á staðnum segi ég ,,til hamingju öll".

 

 

Bryndís Skúladóttir verkefnastjóri

Veðrabrigði marsmánaðar

Það er ekki hægt að segja annað en að marsmánuður hafi verið tími veðrabrigða og í augum leikskólabarna alveg frábær þar sem við fengum bæði helling af snjó en líka svakalega gott veður þar sem hægt var að vera húfulaus og á peysunni úti að leika. 


Það er sko gaman að vera inn í snjóhúsi



Flotta sjóhúsið okkar

En skjótt skipast veður í lofti


Samverustundin var tekin utandyra

Bílabrautin var vinsæl

Myndir úr snjónum eru hér

Myndir úr vorblíðunni eru hér

ÞS

31.03.2016

Verkfræðingar framtíðarinnar

Það var einn rigningardag í nóvember þegar allir þurftu að dúða sig í pollagalla og stígvél enda úrhelli úti.  Það getur verið leiðinlegt úti í rigningu en stundum líka ótrúlega gaman og ákváðum við að hafa þetta skemmtilegan rigningardag.  Það er jú alltaf svolítið gaman að leika sér úti í rigningunni og ekki skemmir fyrir þegar maður er vel klæddur og skóaður.  Víða safnaðist vatn saman í polla og sumstaðar rann það meira að segja í litla læki um lóðina okkar.  Það vill svo vel til að ein rennan á vagnaskúrnum er ekki tengd við frárennslið heldur rennur bara beint út á lóðina.  Við tengdum því slönguna við rennuna ofan á þakinu þannig að nú kom enn meira vatn niður úr rennunni sem vakti heldur betur lukku meðal barnanna því nú var mikið vatn að safnast fyrir neðan rennuendann. 


Smá pollur að myndast við rennuendan og byrjað að grafa skurði til að færa vatnið frá einum stað yfir á þann næsta


Síðan varð að koma vatninu sem lengst í stórum læk

Fleiri myndir hér

 

ÞS

 

22.02.2016

Öskudagssprell 2016

Það er búið að vera líf og fjör í leikskólanum í dag enda uppáhaldsdagur allra barna, öskudagur en þá má maður koma í grímubúning í leikskólann, það er sleginn köttur úr tunnunni og síðan dansað.  Eftir ballið er horft á mynd en elstu nemendurnir fá að kíkja í heimsókn upp í grunnskóla og sjá hvað er gert í grunnskólanum á öskudeginum.  Við fórum svo út að leika í snjónum eftir hádegismatinn og tókum á móti grunnskólakrökkunum sem komu til okkar og sungu vel valin lög í staðinn fyrir eitthvað góðgæti sem þau öll fengu fyrir frábæran söng. 

Sjá myndir hér

 

ÞS

10.02.2016

Myndasýning í Tryggvabúð í dag

Nú ætlum við að halda myndasýningu í Tryggvabúð í dag. 

Sem fyrr byrjum við kl. 17:00 og eru allir hjartanlega velkomnir.

AS

Hænan Droplaug

Hænan Droplaug kom í heimsókn í leikskólann en hún er íslensk hæna frá Bragðavöllum.  Hænan var í búri svo allir áttu auðvelt með að sjá hana auk þess sem Hanna sagði okkur ýmislegt um hænur, hvernig þær borða og hvað þær borða auk þess sem við fengum að vita hvernig þær baða sig. 

Fleiri myndir hér

ÞS

29.01.2016

Þorrablót leikskólans 2016

Þorrablót leikskólans var haldið í dag, bóndadag.  Dagurinn byrjaði á því að öllum karlmönnum sem komu með börnin sín í leikskólann var boðið upp á kaffi.  Síðan fengu börnin sér morgunmat og eftir hann fóru þau í valtíma.  Eftir valtímann var haldið diskótek þar sem börnin tjúttuðu við makarena, superman og hókí pókí auk fleirri skemmtilegra laga.  Eftir ballið var opnað á milli og sest að snæðingi þar sem allir fengu að smakka á þorramatnum. 


Með pabba og afa í heimsókn í leikskólanum

Við dönsum hókí pókí


Rosa stuð á balli


Allir gerðu sér þorrahatta


Síðan snæddu allir þorramat með "bestu" lyst og ýmislegt var smakkað

Fleiri myndir hér

 

ÞS

Starfsmaður óskast

Starfsmaður óskast í leikskólann í 100% starf annars vegar og í 50% starf eftir hádegi hins vegar vegna fjölgunar á börnum og fæðingarorlofs.

Umsóknarfrestur er til 22. janúar en æskilegt er að starfsmaðurinn geti hafið störf fljótlega.
Laun eru skv. kjarasamningi viðkomandi stéttarfélags við launanefnd sveitarfélaga.

Allar nánari upplýsingar veitir leikskólastjóri – umsóknir sendist á netfangið bjarkatun@djupivogur.is eða sendist á skrifstofu leikskólastjóra að Hammersminni 15, 765 – Djúpivogur.

Guðrún Sigurðardóttir
leikskólastjóri

Starfsmaður óskast

Starfsmann vantar í leikskólann;

Starfsmaður óskast í leikskólann í 100% starf og í 50% starf eftir hádegi vegna fjölgunar á börnum og fæðingarorlofs.

Umsóknarfrestur er til 22. janúar en æskilegt er að starfsmaðurinn geti hafið störf fljótlega.

Laun eru skv. kjarasamningi.

Allar nánari upplýsingar veitir leikskólastjóri – umsóknir sendist á netfangið bjarkatun@djupivogur.is eða sendist á skrifstofu leikskólastjóra að Hammersminni 15, 765 – Djúpivogur.

 

Guðrún Sigurðardóttir

leikskólastjóri