Djúpavogshreppur
A A

Leikskóli

Jólaball fyrir alla

Djúpavogsskóli og Hótel Framtíð vilja minna alla íbúa á jólaballið sem fer fram á Hótel Framtíð, á morgun, föstudaginn 16. desember.  Ballið hefst klukkan 11:00 og því lýkur klukkan 12:00.  Nemendur úr tónskólanum sjá um undirspil, nemendur úr grunnskólanum sjá um forsöng.  Allir velkomnir.  HDH

Annasamir dagar

Alltaf er nóg að gera hjá okkur börnunum í leikskólanum.  Það er langt síðan við höfum sett inn frétt en það er bara af því að það hefur verið í nógu að snúast.  Við fengum kanínu í heimsókn í Gestavikunni og það var mjög skemmtileg.  Hún var ótrúlega þæg og góð og rosalega mjúk.  Við fengum meira að segja að knúsa hana. Svo vorum við á Kríudeild að æfa fyrir skuggaleikhúsið sem við sýndum í foreldrakaffinu þann 8. desember.  Þá komu mjög margir gestir í heimsókn til okkar og gáfum við þeim piparkökurnar sem við vorum búin að baka og skreyta (reyndar hjálpuðu konurnar sem vinna í leikskólanum okkur smá þar.) 
Nú hvað getum við sagt meira - jú, við vorum í hlutverkaleik - að leika óléttar konur, því það eru víst bara allir óléttir þessa dagana og okkur fannst það ótrúlega fyndið.  Það var bókadagur á leikskólanum og fengum við að koma með uppáhaldsbækurnar okkar og sýna hvert öðru.  Svo komu krakkarnir í 1. bekk í heimsókn og rifjuðu upp hvað það er gaman í leikskólanum.
Afmælisbörnin fengu næga athygli, bæði þegar afmælisdagurinn þeirra var og líka þegar haldið var uppá afmælið.  Hún Svala er nú svo góð við okkur að baka góðar kökur og leyfa okkur að taka þátt í að skreyta þær.
Það er búið að taka fullt af myndum og má finna þær hér.

Kveðja, krakkarnir í leikskólanum.

Jólapappír til sölu

Foreldrafélagið - leikskóladeild á enn til sölu nokkrar pakkningar af jólapappír.  Þær eru í leikskólanum þessa viku og næstu ef einhverjir hafa áhuga á að styrkja gott málefni.  Einnig eru nokkrar pakkningar eftir af servíettum.
Verðið á jólapappírnum eru 1.800.- (fjórar rúllur og eitthvað dúllerí með).  Servíettur kosta 500.-

Foreldrafélagið

Leynivinavika

Eins og lesendur heimasíðunnar og íbúar á Djúpavogi hafa flestir tekið eftir hafa ýmsir dularfullir atburðir átt sér stað í kringum starfsfólk Djúpavogsskóla sl. viku.  Þetta á sér nú allt saman eðlilegar skýringar en síðustu daga hefur staðið yfir "Leynivinavika."  Þetta byrjaði ósköp sakleysislega.  Hver starfsmaður fékk úthlutað leynivini og áttu menn að vera ósköp góðir við leynivininn sinn mánudag, þriðjudag og miðvikudag.  Fengu allir fallegar gjafir, sem ýmist biðu á skrifborðum fólks á morgnana, voru bornar heim í hús, fengu jafnvel aðstoð frá góðu fólki í þorpinu t.d. sóknarprestinum o.fl.  En á fimmtudaginn fór að færast fjör í leikinn.  Þá átti að hrekkja leynivininn sinn en hrekkurinn mátti ekki vera illgjarn heldur átti að hrekkja "eins við viljum sjálf vera hrekkt."  Hugmyndaflugi fólks eru greinilega lítil takmörk sett því margt fyndið og skemmtilegt kom í ljós.  Frétt var sett á heimasíðuna um draumráðningar, símar voru klættir í plastfilmu, föt og skór voru límd saman, auglýst var ljóðakvöld, settar voru platauglýsingar á Barnaland, blöðrur flutu út úr krókum og kimum og eitt stykki bíll var klæddur í plastfilmu.  Hefur starfsfólkið sést laumast milli bygginga í alls konar erindagjörðum og mikið er búið að hlæja.
Á föstudaginn tók við nýtt verkefni sem stendur til 20:05 í kvöld.  Nú er samkeppni milli starfsmanna grunn- og leikskólans um að prjóna trefil.  Ekki voru mjög flóknar leiðbeiningar um það hvernig trefillinn á að vera:  Fitja skal upp 40 lykkjur og byrja á gulu.  EFtir það var hönnunin frjáls. 

Í kvöld ætlar starfsfólkið að hittast í Löngubúð og halda sína árlegu jólagleði, snæða góðan mat og hlæja mikið.  Þá kemur í ljós hver leynivinurinn er og þá mun dómnefnd skera úr um hver er sigurvegarinn í "treflasamkeppninni."  Ekki er ólíklegt að treflarnir verði myndaðir í bak og fyrir og lesendur fá fregnir af því eftir helgi hvernig keppnin fór.

Meðfylgjandi eru nokkrar myndir af sprellinu sl. viku.  HDH

Gestavika

Í gestavikunni, sem haldin var í Djúpavogsskóla um miðjan nóvember komu margir góðir gestir í grunn-. leik- og tónskólann.  Er þetta í fyrsta sinn sem allir skólarnir eru opnir fyrir heimsóknum í heila viku og gafst þetta mjög vel.  Ein af þeim sem kom í heimsókn var Auðbjörg frá Hvannabrekku.  Hún mætti með kanínu með sér og heimsótti marga með kanínuna.
Á Hvannabrekku er rekið býli sem kallast "Opinn landbúnaður" og það merkir að þangað eru allir velkomnir í heimsókn.  Þar er líka margt að skoða og eigum við í Djúpavogsskóla eftir að nýta okkur það vonandi fyrr en síðar.  HDH

Foreldrakaffi

Kæru foreldrar / forráðamenn

Á fimmtudaginn ætla börnin á leikskólanum að bjóða foreldrum í piparkökur og kaffi.  Þau hafa verið að baka og skreyta undanfarna daga og hlakka mikið til að fá ykkur í heimsókn.
Nemendur á Kríudeild hafa verið að æfa skuggaleikhús sem þeir ætla að sýna þennan sama dag.  Sýningin fer fram klukkan 9:45.

Hlökkum til að fá ykkur í heimsókn,
nemendur og starfsfólk leikskólans.

06.12.2011

Jólaföndur foreldrafélagsins

Verður haldið í grunnskólanum miðvikudaginn 7. desember.  Það hefst klukkan 17:00 og lýkur klukkan 19:00.  Vinsamlegast takið með ykkur tréliti og grófar nálar.

Þá verða nemendur 8. og 9. bekkjar með kaffisölu á sama tíma.

 

Allir hjartanlega velkomnir.

Foreldrafélagið

Dagatal fyrir desember

Dagatal fyrir desember er komið inn á leikskólasíðuna.  Sérstök athygli er vakin á því að leikskólinn verður lokaður frá og með laugardeginum 24. desember, til og með mánudagsins 2. janúar.  Er þetta í fyrsta sinn sem leikskólinn er lokaður á þessum tíma.  Ástæður eru nokkrar:  í fyrsta lagi teljum við mjög mikilvægt að nemendur fái frí eins og aðrir og hafi tækifæri til að njóta jólahátíðarinnar í faðmi fjölskyldunnar, í öðru lagi hefur starfsólkið líka gott af því að hlaða batteríin auk þess sem verið er að samræma opnunartíma leikskólans að hluta við opnunartíma grunn- og tónskóla, þar sem þetta er orðinn ein og sama stofnunin.  Leikskólinn opnar aftur 3. janúar 2012.  HDH

Foreldrahandbók / starfsáætlun

Þá er foreldrahandbókin / starfsáætlunin fyrir skólaárið 2011 - 2012 loksins tilbúin.
Þar sem við erum Grænfánaskóli ætlum við ekki að prenta hana út til að afhenda foreldrum, heldur verður hún sett hér á síðuna, undir skýrslur og áætlanir.  Einnig verður hún send í tölvupósti til foreldra.  Mikilvægt er að foreldrar lesi efni hennar og kynni sér vel.  HDH

23.11.2011

Venjulegur dagur á leikskólanum

Í dag er þriðjudagur, venjulegur dagur á leikskólanum.  Ég sit hér á skrifstofunni minni og hlusta á börnin spjalla og leika sér.
Ég er ekki viss um að hinn almenni borgari geri sér grein fyrir því fjölbreytta starfi sem fram fer í leikskólum landsins, ég vissi það ekki sjálf fyrr en ég fór að vinna hér í húsinu.  Hafði þó að einhverju leyti gert mér grein fyrir því þar sem ég hef átt tvö börn í leikskóla en það er samt öðruvísi að taka þátt í hringiðunni.
Núna er klukkan 9:30.  Einn hópur af börnum er að vinna í listakrók, þau eru að mála plastflöskur og búa til fiska og fugla, einn hópur er í holukubbum.  Þau eru að byggja hús og bíla og nú standa yfir samningaviðræður milli stúlkna og drengja um byggingarefnið og verður forvitnilegt að fylgjast með hvernig það endar.  Þriðji hópurinn er að leira.  Þau eru að búa til listaverk (sögðu þau mér) og sýndist mér það vera alveg rétt.  Fjórði hópurinn er í könnunarleik, eitt barn sefur og tvö börn eru í málörvun.  Matráður er í eldhúsinu að taka til ávaxtaskammtinn sem börnin fá klukkan tíu, einn starfsmaður er að undirbúa skuggaleikhús og hinir sinna börnunum í starfinu, þannig að í nógu er að snúast í leikskólanum Bjarkatúni.

Sl. miðvikudag var Dagur íslenskrar tungu.  Á myndinni sem fylgir þessari frétt má sjá þennan fína karl sem var klæddur í buxur, vexti, brók, skó og bætta sokka.  Hann fékk einnig húfutetur og hálsklút.  Elstu nemendur leikskólans eiga heiðurinn af honum.  Kannski verður eitthvert þeirra fatahönnuður.  Hver veit??

Megið þið eiga góðan dag í dag. 

Kveðja frá nemendum og starfsfólki í Bjarkatúni.  HDH

Dagur íslenskrar tungu

Í dag er Dagur íslenskrar tungu.  Krakkarnir í 1. og 2. bekk unnu með ljóð Jónasar í morgun og bjuggu til þetta fína verkefni sem sjá má hér.  HDH

Jibbí - Grænfáninn kominn upp

Frábær dagur í grunn- og leikskólanum, grænfáninn blaktir við báða skólana og við erum afskapleg glöð.

Dagskráin hófst klukkan 10:00 í leikskólanum.  Þar voru elstu börnin með framsögu og síðan sungu börnin á Kríudeild tvö lög.  Þá ræddi Gerður, frá Landvernd við börnin og foreldrana, sagði þeim frá tilurð Grænfánaverkefnisins, útskýrði fyrir þeim myndina á fánanum o.fl.  Síðan skoðuðu foreldrar glæsileg verkefni sem nemendur hafa verið að vinna að sl. vikur, bæði í tengslum við Grænfánann en einnig í tengslum við Daga myrkurs.  Þegar búið var að klæða öll börnin fórum við út í garð þar sem elstu nemendurnir aðstoðuðu Gerði við að draga fánann að hún.  Sungu þau aftur Grænfánalagið af því tilefni.

Næst lá leiðin upp í grunnskóla.  Þar var mjög svipað fyrirkomulag.  12 nemendur, sem nú sitja í nýkjörnu umhverfisráði sögðu frá starfinu í grunnskólanum fram að þessu auk þess sem þau tæptu á því sem okkur langar að vinna í framhaldinu.  Þá sungu samsöngsnemendur tvö lög, við undirleik og stjórn Józsefs og Andreu auk þess sem nokkrir nemendur úr tónskólanum léku einnig undir.  Síðan ræddi Gerður við börnin og foreldrana, eins og á leikskólanum og að því loknu fórum við út og fyrstu bekkingarnir aðstoðuðu hana við að draga fánann upp.  Þá fór öll hersingin inn aftur þar sem við gæddum okkur á dýrindis skúffukökum með grænu kremi í boði foreldrafélagsins og skoðuðum öll fallegu verkefnin sem börnin hafa verið að vinna í grenndarnáminu.

Ég er mjög stolt og glöð í dag.  Stolt af börnunum í skólanum mínum, Djúpavogsskóla, stolt af starfsfólkinu og stolt af foreldrunum.  Ég er líka ánægð með forsvarsmenn sveitarfélagsins sem hafa sett flokkun og umhverfismál mjög ofarlega í forgangsröð þeirra mörgu verkefna sem þarf að sinna.  Ég trúi því að við séum í sameiningu að ala upp börn og unglinga sem eru meðvituð um hversu mikilvæg við erum, hvert og eitt og hvað við öll skiptum miklu máli með því að taka réttar ákvarðanir í þágu umhverfisins. 

Meðfylgjandi myndir tók Andrés Skúlason.  HDH

Útivera í október

Þrátt fyrir að rigningin hafi verið besti vinur okkar í október, þá hafa komið góðir dagar þar sem börnin hafa getað verið úti að leika sér, án þess að verða rennandi blaut. Hér eru nokkrar útimyndir.  HDH

09.11.2011

Háfur

Hann Pálmi Fannar kom færandi hendi, hér síðasta föstudag.  Hann kom með þennan fallega háf, til að sýna börnunum.  Þau höfðu mikinn áhuga á háfnum og spurðu margs konar spurninga.  Mjög mikilvægt er fyrir börnin að sjá dýr í eigin skinni.  Þannig gera þau sér mikið betur grein fyrir eðli þeirra og útliti og læra að þekkja sitt nánasta umhverfi og lífríki þess.  Við þökkum Pálma kærlega fyrir.  Myndir eru hér.  HDH

09.11.2011

Sr. Sjöfn í heimsókn

Sr. Sjöfn ætlar að heimsækja leikskólann einu sinni í mánuði í vetur.  Fyrsta heimsóknin var fyrir nokkru og tókst hún afskaplega vel.  Sjöfn sagði börnunum sögur, þau sungu og síðan fékk hún Helgu Björk til að aðstoða sig við að leika leikrit.  Af myndum sem finna má hér má sjá að börnin skemmtu sér hið besta og sátu stillt og prúð allan tímann.  HDH

09.11.2011

Grænfáninn dreginn að húni

Á morgun, þann 10. nóvember verður mikill gleðidagur í Djúpavogsskóla.  Þá mun fulltrúi frá Landvernd afhenda grunn- og leikskólunum Grænfánann, sem viðurkenningu fyrir að standa sig vel í umhverfismálum.
Af því tilefni ætlum við að hafa stuttar athafnir í báðum skólunum.  Allir íbúar og velunnarar skólanna eru hjartanlega velkomnir til að fagna þessu tilefni með okkur.
Athöfnin hefst klukkan 10:00 í leikskólanum.  Þar munu leikskólabörnin segja frá því sem þau hafa gert, þau syngja tvö lög og fulltrúi Landverndar flytur ávarp.  Þá sýna börnin verkefni sem þau hafa verið að vinna að sl. vikur.  Síðan verður fáninn dreginn að húni.
Athöfnin í grunnskólanum hefst klukkan 10:45.  Þar munu grunnskólabörnin kynna sína vinnu, samsöngsnemendur syngja tvö lög, fulltrúi landverndar flytur ávarp og fáninn verður dreginn að húni.  Að því loknu verður kaffi, djús og kaka í boði fyrir alla og gestir geta skoðað verkefni sem nemendur hafa unnið að sl. vikur.

Af þessu tilefni ætlum við í Djúpavogsskóla að hafa grænan dag á morgun.  Við ætlum að mæta í grænum fötum í skólana, eða með eitthvað grænt á okkur.  Hvetjum við alla íbúa til að gleðjast með okkur og gera slíkt hið sama.  HDH

Dagatal í nóvember

Dagatal nóvembermánaðar er komið á vefinn.  HDH

28.10.2011

Samstarf leik- og grunnskóla

Samstarf milli leik- og grunnskólans hefur alltaf verið gott.  Elstu nemendur leikskólans komu í fyrstu heimsóknina í grunnskólann fyrir nokkru.  Nemendur 1. og 2. bekkjar gengu um skólann og fræddu þau um starfsemina sem fer fram í grunnskólanum.  M.a. lentu börnin inn í tónmenntatíma hjá 3. og 4. bekk og tóku þau lagið þar með Andreu og börnunum.  Síðan lá leiðin á bókasafnið þar sem margt var að skoða. 
Fljótlega mun 1. bekkur heimsækja gamla leikskólann sinn og rifja upp góðar minningar þar.  Myndir frá heimsókninni eru hér.  HDH

Vetri fagnað

Nemendur og starfsfólk leikskólans fögnuðu vetri þann 21. október sl., en fyrsti vetrardagur var laugardaginn 22. október.  Hefð er fyrir því að halda uppá komu vetrarins með ýmsum hætti.  Ákveðið var að hafa þenna dag búningadag og mættu allir skemmtilegum búningum.  Starfsfólkið lét sitt ekki eftir liggja og blés til samkeppni um fallegasta búninginn.  Að öðrum ólöstuðum áttu Guðrún og Þórdís skemmtilegustu hugmyndina, en Guðrún var prinsessa sumarsins og Þórdís vetur konungur.  Léku þær leikrit fyrir börnin þar sem sumarið kvaddi og veturinn heilsaði.  Þannig fór svo að Þórdís sigraði keppnina um flottasta búninginn.  Börnin fengu síðan vetrarís í tilefni dagsins.  Myndir eru hér.  HDH

Starf í Kríudeild

Starfið í Kríudeild í september og október hefur verið með ýmsu móti.  Börnin eru nú komin fasta "rútínu" yfir daginn.  Þau hafa mörg verkefni sem þarf að sinna.  Á myndunum sem finna má hér má sjá börnin að störfum, halda uppá afmæli, halda bleikan dag hátíðlegan og margt fleira.  HDH

25.10.2011

Starf í Krummadeild

Í októbermánuði hófst vetrarstarfið formlega í leikskólanum.  Börnin fara i gegnum ákveðna dagskrá yfir daginn þar sem unnið er með alla þætti leikskólastarfsins.  Á Krummadeild hafa þau farið í könnunarleik, unnið með gróf- og fínhreyfingar, sungið o.m.fl.  Haldið var uppá eitt afmæli.  Myndir eru hér.  HDH

24.10.2011

Vetri fagnað / búningadagur

Kæru foreldrar
Við minnum á að á föstudaginn verður vetri fagnað í leikskólanum.  Þá hvetjum við alla til að mæta í búningi.  Ætlum að hafa diskótek og gera margt skemmtilegt í tilefni dagsins.  HDH

19.10.2011

September í leikskólanum

Ýmislegt hefur á daga okkar drifið í leikskólanum nú í september.  Börnin byrjuðu í vetrarstarfinu, héldu uppá afmælin sín, höfðu bangsadag, borðuðu nesti úti í góða veðrinu og fengu umferðafræðslu (Kríudeild) í heila viku.  Þá var "Bangsadagur" þar sem börnin máttu koma með eitt tuskudýr að heiman.  Vakti það mikla lukku. 
Búið er að taka margar myndir en þær hafa ekki ratað á heimasíðuna fyrr en nú.  Hér fyrir neðan getið þið skoðað það sem búið er að setja inn og verða fleiri myndir vonandi settar inn næstu daga.  HDH

Í starfi

Afmæli í september

Bangsadagur

 

18.10.2011

Bleikur dagur á föstudaginn

Föstudagurinn 7. október er bleikur dagur í grunnskólanum og leikskólanum.  Þann dag hvetjum við nemendur og starfsfólk til að mæta í einhverju bleiku eða með eitthvað bleikt í skólana.
Í októbermánuði vill Krabbameinsfélag Íslands vekja athygli á brjóstakrabbameini og mikilvægi þess að konur fari reglulega í skoðun.  Viljum við með bleika deginum sína hug okkar í verki.  Við hvetjum aðra íbúa í sveitarfélaginu til að gera slíkt hið sama.  HDH

Bangsadagur

Á föstudaginn er bangsadagur í leikskólanum.  Hvert barn má taka með sér 1 bangsa.  HDH

21.09.2011

Grunn- og leikskóli lokaðir á föstudaginn

Foreldrar / forráðamenn vinsamlegast athugið

Vegna haustsþings leikskólakennara, grunnskólakennara og annarra starfsmanna í grunnskólanum föstudaginn 16. september verða leikskólinn og grunnskólinn lokaðir þennan dag.

Skólastjóri

Ferð í berjamó

Nemendur Kríudeildar, fóru ásamt starfsfólki í berjamó, sl. miðvikudag.  Lögðu þau land undir litla fætur og gengu yfir í Loftskjólin.  Þar fundu þau krækiber og borðuðu á sig gat, eins og sjá má á myndunum hér.  Þegar þau komu heim, með misfulla poka af berjum, lögðu þau í púkk og buðu nemendum Krummadeildar og öllu starfsfólkinu uppá berjaskyr.  HDH