Fuglavefur

Hér með eru allir íbúar sem vettlingi geta valdir hvattir til að taka þátt í að uppræta lúpínu hér í þéttbýlinu og á nærsvæði á næstu dögum og vikum.  Samhliða er stefnt að því að sveitarfélagið vinni að því á næstunni að uppræta lúpínuna þar sem hún hefur breitt mest úr sér.

Um þessar mundir er einmitt talið rétti tíminn til að herja á þennan skaðvald sem ógnar m.a. tilveru íslensku flórunnar á stórum svæðum. Íbúum er hér með gefnar frjálsar hendur með að slá þetta illgresi niður, hvort heldur með sláttuorfum eða öðrum brúklegum verkfærum.  Að þessu tilefni er því beint til íbúa í viðkomandi hverfum að einbeita sér fyrst og síðast að þeim svæðum.   

Hér með er komið á framfræri leiðréttingu vegna þessarar áður fluttu fréttar frá 29 júní síðastliðinn  - en sá sem smíðaði þennan glæsilega grip heitir Ingólfur Geirdal og er því hér með komið á framfæri. 

Í gær mætti Axel Jónsson (bróðir Öldu á Fossárdal) færandi hendi á skrifstofu sveitarfélagsins með gjöf til fuglaverkefnisins og er gjöfinni ætlaður staður í fuglaskoðunarhúsi hér út við vötnin, en Axel hrósaði einmitt heimamönnum fyrir þá aðstöðu sem þar væri komin upp með byggingu fuglaskoðunarhúsa og fl. 

Gjöfin er sem sagt forláta baukur fyrir frjáls framlög gesta sem koma við á fuglaskoðunarsvæðinu og vilja styðja við fuglaverkefnið.  Baukinn smíðaði Ingólfur Geirdal og er mikil listasmíð, glansandi og úr ryðfríu stáli eins og sjá má á mynd.  
Hér með eru  Axel og smiðnum góða Ingólfi færðar hinar bestu þakkir fyrir þennan glæsilega grip sem á án efa eftir að skila sínu.  

AS

Andrés Skúlason tekur fagnandi við gjöfinni frá Axel Jónssyni 

Við bæinn Hvarf á Djúpavogi hefur maríerla gert sér hreiður inn á milli steina sem stillt hefur verið upp í hillu við íbúðarhúsið.  Hér má sjá hvar maríuerlan er að fóðra unga sína svo og má sjá skemmtilegar myndir af erlunni þar sem hún situr á útskornum lunda sem er að finna þarna í húsagarðinum.  AS 

Í dag mátti sjá fjóra skeiðandarsteggi á vatni við svokallaðar Selabryggjur á Búlandsnesi, en skeiðöndum hefur jafnt og þétt fjölgað á svæðinu á síðustu árum, en nú er vitað um a.m.k. þrjú skeiðandarvarppör hér við vötnin. AS

5 - 6 pör af flórgoða hafa verpt við vötnin á Búlandsnesi á undanförnum árum og nú má m.a. sjá tvö flórgoðapör við Fýluvoginn með hreiður, en hreiðrin eru haganlega gerð og eru fljótandi í sefinu.  AS 

Í dag meldaði Sigurjón Stefánsson hóp af sanderlum út í Hvaleyjarfjöru, sem er sandvíkin milli Kálks og Hvaleyjartagla. 
Að þessu sinni sáust ekki merktar sanderlum en töluvert algengt er að sjá merkta fugla þarna á ferð.  AS

Í gær mátti sjá brandandarpar með 9 stk unga á Nýjalóni við flugvöllinn á Búlandsnesi. Ekki er vitað til að brandöndin hafi verið komin áður svo snemma með unga hér á svæðinu.  AS

Í gær tilkynnti Sigurjón S fuglaskoðari um taumönd á Fýluvogi og í dag sá hann tvær svölur á flugi þar á svæðinu.  AS 

Mynd Brynjúlfur Brynjólfsson 

Hér má sjá myndir af brandandarpari sem var við leik í gær á vatninu við svokallaðar Selabryggjur á Búlandsnesi. AS 

Mjög stór hópur af rauðbrystingum sást í Grunnasundi í dag og töldu fuglarnir vel á annað hundrað.  Fuglunum hefur almennt fjölgað mikið á svæðinu á síðustu tveimur dögum, má þar nefna að óðinshani hefur komið í miklu magni, smærri fuglar líka eins og þúfutittlingar og maríuerlur. Fjögur lómapör eru komin og svo er krían líka að mæta í töluverðum mæli á svæðið og er vonandi að varp hennar misfarist ekki eins og stundum á síðari árum.  Spóinn sást líka i hópum í gærkvöldi.   AS

Þá er óðinshaninn mættur á svæðið en nokkrir fuglar sáust í dag í norðanstrekkingnum sem gengur nú yfir svæðið. 
Óðinshaninn mætir yfirleitt síðastur fugla og svo er að þessu sinni einnig. AS 

Í dag sást hringönd (kk) á tjörninni úti í Hvaley, með nokkrum skúföndum.  Hringönd sást síðast á Djúpavogi árið 2009.  AJ

Þessa dagana má sjá tvo dvergsvani á ferð og flugi hér í sveitarfélaginu en annar þeirra heldur sig út af svokallaðri Krossflöt við botn Hamarsfjarðar en hinn dvelur við Fossárvík og sást þar síðast í gær.  Dvergsvanurinn við Hamarsfjörð er merktur eins og sjá má hér á mynd sem tekin var í Hamarsfirði í dag.
Heimkynni dvergsvana eru á túndrum Rússlands og þeir eru minnstir svana á norðurhveli.  AS 

Í morgun sást eyrugla í garðinum í Kápugili.  Uglan flaug tvisvar alveg upp undir húsið en fór síðan út fyrir girðinguna og sat lengi undir kletti. 
Eyrugla verpir í Evrópu, Asíu og N-Ameríku.  Eyrugla er meðalstór ugla og er varptími frá febrúar til júlí. Eyruglur eru að hluta til farfuglar sem fljúga suður á bóginn á veturna. Heimkynni eyrugla eru skógarjaðrar nálægt opnu svæði.  
Eyruglur veiða á opnum svæðum að nóttu til. Fæða eyruglna er aðallega nagdýr, lítil spendýr og fuglar.  Eyruglur eru nýir landnemar á Íslandi og hafa verpt þar. Þær má þekkja frá branduglum á því að þær hafa stærri eyru og augu þeirra eru appelsínugul en gul í branduglum (tekið af Wikipedia).  AJ

Í morgun tilkynnti Jóhann Óli Hilmarsson um komu gargandar á Fýluvogi en þar voru mættir þrír steggir og ein kolla. Seinna í dag sást svo kríur fljúga inn yfir landið og síðar kjóar, en ljóst er að með sunnanáttinni í dag hafa margir nýjir fuglar náð landi.

Sl. miðvikudag, 25. apríl fundust nokkur gæsahreiður á Búlandsnesi, með fjórum eggjum í sem þýðir að gæsin hefur byrjað að verpa um 20. sem er óvenju snemmt.  Gaman væri að vita hvort einhver veit til þess að hún hafi áður orpið svona snemma, eða jafnvel fyrr.

Í dag sást skeiðönd á fýluvogi og eins fjölgar í öðrum tegundum, sérstaklega grafönd.  AJ

Þá er hrossagaukurinn mættur á svæðið. AS 

Í morgun sáust tvær margæsir út við Hvaley og einnig var mikið af heiðlóu úti á söndum.
Eins hefur gráhegri sést í Álftafirði í kringum Oddana.  AJ

Í dag tilkynnti Þorbjörg Sandholt hóp af heiðlóu hér við þéttbýlið á Djúpavogi.  AS

Þá eru stelkarnir mættir á svæðið og sáust m.a. nokkrir út við Hvaley á Búlandsnesi í dag.  AS 

Í dag meldaði Sigurjón Stefánsson fuglagreinir skúfandarkarl á svokölluðu Bóndavörðuvatni á Búlandsnesi og er það fyrsta skúföndin sem sést á þessu ári. AS 

Í dag mátti sjá hettumáf hér við höfnina á Djúpavogi og er þetta sá fyrsti sem sést hér á svæðinu á þessu vori. AS 

Hér má sjá flórgoðapar við hreiðurgerð á Fýluvogi en eins og komið hefur fram eru flórgoðarnir mættir nú þegar á Fýluvoginn.  AS 

Farfuglarnir eru farnir að láta sjá sig og í morgun mátti sjá brandandarpar á Nýjalóni, lómapar og rauðhöfðapar á Breiðavogi svo og flórgoða. Grágæsirnar hafa svo verið að streyma inn síðustu daga hér inn á svæðið. Má segja að fuglarnir séu almennt snemma á ferðinni í ár enda hafa hlýindi verið óvenjumikil að undanförnu.  AS