Djúpavogshreppur
A A

Pokastöðin saumar poka á mánudaginn

Pokastöðin saumar poka á mánudaginn
Cittaslow

Pokastöðin saumar poka á mánudaginn

Greta Mjöll Samúelsdóttir skrifaði 29.03.2019 - 15:03

Með leikskólann Bjarkatún að fyrirmynd ásamt Pokastöðvum sem hafa sprottið upp um allt land síðustu misseri hefur Djúpavogshreppur hrint af stað Pokastöð ásamt frábærum sjálfboðaliðum í bæjarfélaginu. Pokastöðin Djúpavogi hittist fyrsta mánudag hvers mánaðar í Tryggvabúð kl. 20 og saumar fjölnota poka til notkunar í Djúpavogshreppi og víðar.

Mánudaginn næsta, 1.apríl kl. 20, verður Pokastöðin Djúpavogi með opið í annað sinn. Allir hjálpast að við að sauma fjölnota burðarpoka úr efnisafgöngum og bolum og er fólk beðið um að koma með verkfæri með sér, þó einhver verði á staðnum. Cittaslow miðstöðin/Djúpavogshreppur býður upp á kaffibolla og með´í.

Pokastöðin Djúpavogi hefur sett sér markmið að útrýma einnota plastpokum úr verslunum í Djúpavogshreppi. Með því að gera fjölnota taupoka aðgengilega til láns í verslunum og þjónustustöðvum er vonast til að vekja fólk til vitundar um skaðsemi plastnotkunar og takmarka þannig plastnotkun á svæðinu. Pokastöðin Djúpavogi er hluti af stærra samfélagi sem er stýrt frá Pokastöðinni á Höfn í Hornafirði en auk þess er samstarfi við alþjóðlega verkefnið Boomerang bags. Hægt er að nálgast frekari upplýsingar hér.

Pokastöðin er rekin af Cittaslow miðstöð Íslands sem er staðsett í Djúpavogshreppi en með sjálfboðavinnu frá sjálfboðaliðum. Við hvetjum fólk til tína til efnisafganga, gamla boli, sængurver, lök og hvaðeina sem fellur til og taka með sér í saumahittingana. Einnig verður hægt að koma hlutum fyrir til Pokastöðvarinnar í Nytjamarkaðinum Notó á laugardögum og til Möggu í Tryggvabúð á opnunartíma.

Kaffi og kruðerí verður alltaf á staðnum þegar Pokastöðin hittist fyrsta mánudagskvöld í hverjum mánuði.

Allir eru velkomnir og þarf enga reynslu eða kunnáttu í saumaskap til að vera hluti af verkefninu. Öll getum við tekið þátt með því t.d. að gefa efni, koma og sauma eða bara breiða út boðskapinn og hvetja hvert annað áfram.

Vertu með í facebook hóp verkefnisins!