Djúpivogur
A A

Leikhópurinn Lotta á Djúpavogi 19. júlí

Leikhópurinn Lotta á Djúpavogi 19. júlí

Leikhópurinn Lotta á Djúpavogi 19. júlí

skrifaði 18.07.2014 - 15:07

Leikhópurinn Lotta sýnir Hróa hött, glænýtt íslenskt leikrit með söngvum í Djúpavogi þann 19. júlí klukkan 18:00. Þetta er áttunda sumarið sem Leikhópurinn Lotta setur upp útisýningu en síðastliðin sumur hefur hópurinn tekist á við Gilitrutt, Stígvélaða köttinn, Mjallhvíti og dvergana sjö, Hans klaufa, Rauðhettu, Galdrakarlinn í Oz og Dýrin í Hálsaskógi. Frumsýnt var í Elliðaárdalnum í Reykjavík miðvikudaginn 28. maí og í framhaldinu hefur hópurinn ferðast með sýninguna og heimsótt yfir 50 staði víðsvegar um landið. 

Höfundur Hróa hattar er Anna Bergljót Thorarensen. Þetta er fjórða leikritið sem hún skrifar fyrir hópinn en hún hefur verið meðlimur í Leikhópnum Lottu frá stofnun hans árið 2006. Ný tónlist hefur einnig verið samin fyrir verkið. Textarnir eru allir eftir Sævar Sigurgeirsson en lögin sömdu meðlimir leikhópsins sjálfir.

Söguna um Hróa hött þekkja flestir en í útgáfu Leikhópsins Lottu fléttast ævintýrið um Þyrnirós inn í atburðarrásina og úr verður einstaklega fjörugt og skemmtilegt verk. Alls eru sex leikarar í sýningunni sem skipta á milli sín 12 hlutverkum. Þá er flutt lifandi tónlist, söngur og dans og því nóg um að vera. Þessu er síðan öllu haldið saman af leikstjóranum og er hann enginn annar en Vignir Rafn Valþórsson.

Miðaverð á sýninguna er 1.900 krónur og ekki þarf að panta miða fyrirfram heldur er alveg nóg að mæta bara á staðinn. Gott er að klæða sig eftir veðri þar sem sýnt er utandyra. Þá mælir Lotta með því að foreldrar taki myndavélina með þar sem áhorfendur fá að hitta persónurnar úr leikritinu eftir sýningu. Öllum þykir jú gaman að eiga mynd af sér með uppáhalds vini sínum úr Ævintýraskóginum.


Nánari upplýsingar um sýninguna má finna á www.leikhopurinnlotta.is og í síma 770-0403.

Myndir má síðan nálgast hér:
https://www.dropbox.com/sh/noc11mgijjekgh1/AADDTTB_yC5F6vxWbMmSfPy3a

bestu kveðjur,
Leikhópurinn Lotta

770-0403

leikhopurinnlotta@gmail.com
www.leikhopurinnlotta.is

Fylgstu með okkur á facebook & Instagram

https://www.facebook.com/leikhopurinnlotta
Instagram: leikhópurinnlotta