Djúpavogshreppur
A A

Kosið um sameiningu þann 26. október

Kosið um sameiningu þann 26. október

Kosið um sameiningu þann 26. október

Greta Mjöll Samúelsdóttir skrifaði 04.07.2019 - 13:07

Sveitarstjórnir Borgarfjarðarhrepps, Djúpavogshrepps, Fljótsdalshéraðs og Seyðisfjarðarkaupstaðar hafa samþykkt tillögu samstarfsnefndar um að íbúar fái tækifæri til að kjósa um tillögu um sameiningu sveitarfélaganna þann 26. október næstkomandi.

Kosningarnar fara fram í samræmi við lög um kosningar til sveitarstjórna. Kosið verður í hverju sveitarfélagi fyrir sig og ræður einfaldur meirihluti atkvæða niðurstöðunni. Til að sameining verði samþykkt þarf meirihluta atkvæða í hverju sveitarfélagi fyrir sig. Verði tillagan ekki samþykkt í öllum sveitarfélögunum, er heimilt að sameina þau sveitarfélög þar sem íbúar samþykktu, að því gefnu í þeim búi að minnsta kosti 2/3 íbúanna og að 2/3 hluti sveitarfélaganna samþykki.

Samstarfsnefndinni er falið að sjá um kynningu tillögunnar og er undirbúningur þess hafinn. Gert er ráð fyrir að kynningarstarf hefjist í ágúst með almennri auglýsingu. Í september verði kynningarefni dreift á heimili í sveitarfélögunum og íbúafundir haldnir í annarri viku október. Kynningarefni er jafnframt aðgengilegt á vefnum svausturland.is

Þar er hægt að nálgast skýrslu samstarfsnefndar, fundargerðir og annað efni um sameiningarferlið. Á vefnum má líka finna algengar spurningar og svör við þeim, auk þess eru íbúar hvattir til að senda fyrirspurnir í gegnum vefinn.

Samstarfsnefnd hvetur íbúa til að kynna sér málið vel og mæta á kjörstað 26. október.