Djúpavogshreppur
A A

Hugum að geðheilbrigði

Hugum að geðheilbrigði

Hugum að geðheilbrigði

Ólafur Björnsson skrifaði 03.04.2020 - 14:04

Hugrún, geðfræðslufélag háskólanema, hvetur til umræðu um geðheilsu og geðraskanir og hefur gefið út vefsíðu með leiðbeiningum um hvernig má ræða þessi málefni heima fyrir.

Á gedfraedsla.is er hægt að nálgast upplýsingar um geðheilsu, geðraskanir og úrræði. Hluti síðunnar er tileinkaður foreldrum, forsjáraðilum og skólastarfsmönnum og þar eru leiðbeiningar til að opna á umræðu við ungmenni um þessi mál með markvissum hætti og veita þeim geðfræðslu. Slík fræðsla er mikilvæg fyrir ungt fólk og í samfélaginu almennt. Hún getur aukið vitneskju, dregið úr fordómum, dregið úr alvarleika vandans og auðveldað ungu fólki að leita til einhvers sem þau treysta þegar þau upplifa andlega erfiðleika. Hugrún geðfræðslufélag hvetur til opinnar umræðu og þess að fólk nýti leiðbeiningarnar til að veita ungmennum geðfræðslu.

Þrátt fyrir mikinn fjölda aðfluttra Íslendinga er oft erfitt að nálgast áreiðanlegar upplýsingar um geðheilsu og úrræði á öðrum tungumálum en íslensku. Mikilvægi síðunnar sem upplýsingaveita á fleiri tungumálum er því mikið en allt efni gedfraedsla.is er aðgengilegt á íslensku, ensku og pólsku.

Hugrún, geðfræðslufélag er rekið af háskólanemum í sjálfboðaliðastarfi. Félagið hefur það að markmiði að fræða ungt fólk um geðheilbrigði, geðraskanir og úrræði, sem og að auka samfélagslega vitund. Stærsta verkefni Hugrúnar ár hvert er að ferðast um landið og halda geðfræðslufyrirlestra í framhaldsskólum, endurgjaldslaust. Starfsemi félagsins er haldið uppi af áhugasömum háskólanemendum sem brenna fyrir því að bæta vitneskju um geðheilbrigði, útrýma fordómum og styrkja ungmenni. Félagið er rekið á styrkjum, frjálsum framlögum og fjáröflunum, allur ágóði rennur í fræðslu ungmenna um geðheilbrigði.

facebook.com/gedfraedsla
instagram.com/gedfraedsla