Aðalvefur

Þá er fyrsta vika þessa skólaárs liðin.  Ekki var annað að sjá og heyra en að flestir nemendur og starfsfólk væru fegin því að komast aftur í reglu og ró, eftir annasamt og skemmtilegt sumar.  Einhver forföll hafa verið bæði hjá nemendum og starfsfólki en það þýðir ekki að við hin höfum setið auðum höndum, nei aldeilis ekki.  Í morgun fór skólastjóri af stað með myndavélina og kom að nemendum 1. og 2. bekkjar í handavinnu hjá Guðnýju.  Vegna forfalla hafði hún fengið frægan trommuleikara til að aðstoða sig við að þræða nálarnar og var ekki annað að sjá en að hann stæði sig með sóma (enda giftur saumakonu og greinilega vanur að aðstoða hana við nálarnar).  Krakkarnir í 3.-5. bekk fóru út að safna blómum og skoða muninn á barrtrjám og grenitrjám.  Þau ætla að þurrka það sem þau fundu og koma með fleiri sýnishorn að heima í næsta tíma.  Myndir af þessu duglega fólki má finna hér.  Njótið helgarinnar.  HDH

Eins og flestir vita var gamla húsið á Skála rifið nú á dögunum. Húsið var byggt árið 1922 og var því orðið 87 ára gamalt. Fjallað var um þetta í kvöldfréttum RÚV sl. föstudag og rætt við Guðjón Smára eiganda Skála og Guðrúnu Jónsdóttur arkitekt FAÍ sem m.a. hefur verið að vinna að nýju Aðalskipulagi fyrir Djúpavogshrepp.

Fréttina má skoða með því að smella hér.

ÓB

Menningarráð Austurlands vann á síðasta vetri stefnu í menningarmálum fyrir Austurlands og var stefnan samþykkt á aðalfundi Menningarráðs 7. maí síðastliðinn og undirrituð af öllum sveitarfélögum innan SSA.

Stefnan er nú aðgengileg hér á heimasíðu Djúpavogshrepps og hana má nálgast með því að smella hér.

ÓB

Okkur á heimasíðunni hefur borist fyrirspurn frá Arndísi Þorvaldsdóttur hjá Héraðsskjalasafni Austfirðinga. Hún segir að þegar hún var ung hafi stundum birst í Tímanum fyrripartar og í framhaldi af því botnar. Einhverju sinni varð úr því þessi vísa:

Búlandstindur býsna fagur,
Berufjarðar prýðir sveit.
Það var mikill dýrðardagur
er drottinn honum valdi reit.

Hún segist stundum hafa farið með þessa vísu en enginn kannist við hana.

Því fannst okkur upplagt að setja vísu þessa hér inn á heimasíðuna og athuga hvort einhverjir geti frætt Arndísi og þar með okkur um höfunda vísunnar (þ.e. höfund fyrri partsins og höfund seinni partsins).

Allar ábendingar eru að sjálfsögðu vel þegnar og er hægt að senda þær með tölvupósti á netfangið djupivogur@djupivogur.is eða í síma 478-8288.

ÓB

Eftir úrhellisrigningu seinni partinn í gær (fimmtudag) heilsaði okkur þessi fallegi regnbogi.

ÓB

Hvernig myndi Djúpivogur líta út ef hann sneri öfugt? Væri jafnvel staðsettur á Vesturlandi. Undirritaður hefur mikið velt þessu fyrir sér og ákvað að nýta einfalda tækni til að komast að því.

Niðurstaðan er einföld, hann er frekar kjánalegur svona öfugur. En sitt sýnist hverjum og hér gefur að líta nokkur sýnishorn af hinum nýja Djúpavogi.

ÓB

Fimmtudaginn 13. ágúst, deginum fyrir vígsludag listaverksins Eggin í Gleðivík ræddi Ásgrímur Ingi Arngrímsson í svæðisútvaprinu á Austurlandi við Sigurð Guðmundsson höfund verksins, um söguna á bakvið ævintýrið.

Hægt er að hlusta með því að smella hér.

ÓB

Sigurður Guðmundsson við eitt eggjanna, steindepilseggið

Fréttastofa RÚV fjallaði í kvöldfréttum sínum á mánudaginn um komu skemmtiferðaskipsins ms. Maasdam til Djúpavogs. M.a. var rætt við Bryndísi Reynisdóttur, ferða- og menningarmálafulltrúa Djúpavogs.

Smellið hér til að skoða fréttina.

ÓB

Það var tignarleg sjón sem blasti við íbúum Djúpavogs í gærmorgun þegar skemmtferðaskipið Maasdam sigldi inn fjörðinn og lagðist við festar hér í Berufirðinum. Þetta er í annað skiptið sem Maasdam kemur til Djúpavogs en síðast kom það í júlí 2007.  Skipið er í eigu Holland America Line og siglir héðan til Reykjavíkur.

Farþegafjöldinn um borð í skipinu var rétt rúmlega 1200 manns og áhöfnin 450.
Stærðartölur skipsins eru þessar:

Lengd: 220 metrar

Breidd: 32 metrar

Djúprista: 7,65 metrar

Skipulagðar voru ferðir á Jökulsárlón, inn í Fossárdal og út í Papey og má reikna með að samanlagt hafi fjöldi þeirra gesta sem fóru í þessar ferðir verið í kringum 200 manns.  Aðrir gestir röltu bara um bæinn og nutu þess sem fyrir augu bar.

Koma skipsins setur óneitanlega mikinn svip á bæjarlífið enda fjöldi farþegana margfalt fleiri en íbúar sveitarfélagsins.  Allstaðar um þorpið mátti sjá gesti spóka sig um, njóta náttúrunnar eða nýta sér þá þjónustu og afþreyingu sem hér er í boði. 

Á Bjargstúninu var handverksmarkaður í stóru tjaldi, en þar voru á boðstólnum vörur frá handverksfólki hér á  Djúpavogi og svo einnig frá Hornarfirði, fjölmargir gestir skipsins lögðu leið sína á markaðinn.

Markaðssetning og móttaka á skemmtiferðaskipum er langtímaverkefni og er unnið markvisst að því að fjölga skipakomum  til Djúpavogs.  Dagur sem þessi skilur vissulega eftir sig dýrmæta reynslu í reynslubanka ferðamálafulltrúans og tækifæri til þess að gera enn betur við mótttöku á næsta skipi.

Ferða – og menningarmálafulltrúi Djúpavogs vill nota tækifærið og þakka öllum þeim er lögðu hönd á plóg við að taka á móti gestum Maasdam.  Áberandi samstaða og samvinna var ríkjandi meðal ferðaþjónustuaðila, sem og íbúa á Djúpavogi sem skilaði sér í einstaklega vel heppnuðum degi.  BR/AS

Verk Sigurðar Guðmundssonar listamanns var sem kunnugt er vígt með formlegum hætti við Gleðivík síðastliðinn föstudag.  Að því tilefni er ekki úr vegi að birta hér nokkrar myndir frá undirbúningi, vígsludeginum svo og af listaverkinu sjálfu lesendum síðunnar til yndisauka.
Fyrir hönd sveitarfélagsins vill undirritaður nota tækifærið hér og þakka listamanninum sérstaklega skemmtilega og gefandi tíma meðan hann dvaldi í Himnaríkinu sínu hér á Djúpavogi.  AS.

Eggin komu í þessum trékössum alla leið frá starfstöð listamannsins í Kína

Egill vandar sig við að koma fyrsta egginu á stöpulinn sinn

Bryndís Reynisdóttir menningar- og ferðamálafulltrúi með Sigurði listamanni við fyrsta eggið (lundaeggið)

Það tóku margar röskar hendur þátt í uppsetningunni og gekk verkið vonum framar

Hér er stóra lómseggið á leiðinni á stallinn, starfsmenn áhaldahússins vanda til verka

Og svo var eggið stóra híft á síðasta stöpulinn

Sigurður Guðmundsson og kona hans Ineke stilla sér stolt upp við lómseggið

Á vígsludaginn, Andrés Skúlason oddviti og listamaðurinn Sigurður Guðmundsson afhjúpa verkið

Björn Hafþór Guðmundsson sveitarstjóri heiðrar hjónin á vígsludegi

Og færir þeim tvær myndir að gjöf

Listamaðurinn flytur ávarp í tilefni dagsins

Svo er spjallað um listina milli atriða

Björn Hafþór Guðmundsson sveitarstjóri og Hlíf Herbjörnsdóttir taka sig vel út við egg skógarþrastarins

Svo gengu menn með 200 m löngu listaverkinu og skoðuðu hvert egg fyrir sig

Ingimar Sveinsson og listamaðurinn á góðu spjalli

Svo var grillað á eftir

Meira grill


Andrés Skúlason oddviti ásamt listamanninum við egg óðinshanans

Ineke og Sigurður bregða á leik við egg steindepilsins

Listamaðurinn og steindepilseggið

Horft yfir höfnina og listaverkið ofan af lýsistanknum

Eggin ólík að lit og formi

Egg skógarþrastarins

Lómseggið í forgrunni

Eggin skarta sínu fegursta við Gleðivíkina

Strandafjöllin eru flott í bakgrunni eggjanna

Sigurður og Ineke alsæl að vígsludegi loknum úti á svölum í Himnaríki ( nafn á heimili listamansins)

Hér fyrir neðan má sjá kynningarbækling um eggin í Gleðivík, unninn af ferða- og menningarmálafulltrúa Djúpavogshrepps og sveitarstjóra Djúpavogshrepps.

Smellið hér til að skoða hann

Með samþykki Ólafs Áka Ragnarssonar og þess aðila sem málið beindist að hefur verið ákveðið að taka bréfið út.

ÓB

Foreldrar og forráðamenn athugið !

Síðustu sund- og frjálsíþróttaæfingar sumarsins voru í dag (þriðjud. 18. ágúst ) og síðustu fótboltaæfingarnar verða á morgun 19. ágúst.

 Sjáumst svo öll á Neista-daginn 20. ágúst kl.17:00

UMF Neisti

Neistadagurinn verður haldinn fimmtudaginn 20. ágúst.

Setningarhátíð verður kl. 17:00 og keppt verður í eftirfarandi greinum:

Frjálsum
Fótbolta
Kubb
Blaki

Skráning á staðnum.

Kaffi og pylsur í boði Neista

Hittumst hress,

Stjórn UMF Neista

5. flokkur Neista spilar við Einherja Vopnafirði á Neistavelli kl:12:30 í dag.

Fjölmennum á völlinn og styðjum strákana í síðasta leik sumarsins.

UMF.Neisti

Leikjanámskeið Neista verður í þessari viku, mánudag - föstudag milli 11:00 og 12:00.

Ester sækir börnin í leikskólann.

UMF Neisti.

Listaverkið „Eggin í Gleðivík“ eftir Sigurð Guðmundsson var vígt í dag.  Nánar verður gerð grein fyrir athöfninni hér á heimasíðunni m.a. með birtingu mynda, sem teknar voru við athöfnina.

Undirrituð vilja hér með þakka fjölmörgum íbúum byggðarlagssins og öðrum gestum fyrir mikla þátttöku í athöfninni.  Einnig eru þakkaðar góðar óskir og kveðjur sem fluttar voru.  

Eftirtöldum eru færðar sérstakar þakkir:
SG Vélar - Kristján Karlsson – Austverk - Emil Karlsson - Vísir HF –Flytjandi -Kristján Guðmundsson  - Sérleyfisferðir Hauks Elísson –Samkaup Djúpavogi - Hreinn Guðmundsson – Við Voginn – Hornabrauð – Vífilfell  og Björgunarsveitin Bára.  Enn fremur fá þakkir ýmsir starfsmenn Djúpavogshrepps, sem unnu að uppsetningu og öðrum atriðum er tengjast listaverkinu.

Hæsti einstaki styrkur til þessa er frá Nordic Factory ehf, sem gaf tvær milljónir til verksins og eru fyrirtækinu hér með færðar alúðarþakkir fyrir. Enn fremur hafa borist staðfestingar á fjárframlögum frá Unnþóri Snæbjörnssyni, Birni Hafþór Guðmundssyni og Hlíf Herbjörnsdóttur.

Að lokum viljum við færa  listamanninum, Sigurði Guðmundssyni, alúðarþakkir fyrir einstaklega gott samstarf og frábært höfundarverk, sem auka mun enn frekar á hróður hans og  verða lyftistöng fyrir Djúpavog um ókomna framtíð.

Andrés Skúlason oddviti,
Bryndís Reynisdóttir ferða – og menningarmálafulltrúi.

Þó tekið sé að rökkva á kvöldin og haustið ekki svo langt undan, erum við í Löngubúð ennþá í sumarskapi.

Laugardagskvöldið 15.ágúst ætla þeir Kristján Ingimars og Jón Einar að mæta með gítarana sína og spila og syngja fyrir okkur fram eftir kvöldi. Við vonumst að sjálfösgðu til þess að sem flestir nýti sér tækifærið til að sýna sig og sjá aðra áður en sumarið er allt.

Húsið opnar kl. 21:00, aðgangseyrir krónur 500 og tilboð á barnum.

Sjáumst í Löngubúðinni !

Halla Eyþórsdóttir frá Fossárdal í Djúpavogshreppi opnar um helgina ljósmyndasýningu í Sláturhúsinu á Egilsstöðum, nánar tiltekið í "Frystiklefanum". Halla hefur undanfarin ár búið í Amsterdam í Hollandi. Sýning Höllu er litrík fjölbreytt og algjört augnayndi.

Nánari upplýsingar um tímasetningu er hægt að sjá með því að skoða auglýsingu hér fyrir neðan.

Hægt er að skoða myndir eftir Höllu á Flickr-síðu hennar með því að smella hér.

ÓB

Þann 18.ágúst næstkomandi er von á skemmtiferðaskipinu Ms.Maasdam til Djúpavogs. Skipið er hið allra glæsilegasta og gríðarlega stórt en farþegafjöldinn er rúmlega 1000 manns. Skipið hefur áður komið til Djúpavogs, sumarið 2007.

Ákveðið hefur verið að hafa opinn markað þennan dag með ýmiss konar vörur til sölu t.d. minjagripi og  íslenskt handverk en einnig svæðisbundnar matvörur s.s. hákarl, sultu og fleira þess háttar.

Því vil ég biðja alla þá, sem áhuga hafa á því að selja vörur sínar, að tilkynna þátttöku á netfangið bryndis@djupivogur.is eða í síma 478-8228 sem fyrst, í síðasta lagi fyrir kl.16:00 sunnudaginn 16.ágúst.

Ferða-og menningarmálafulltrúi Djúpavogshrepps

„Eggin í Gleðivík“

 Vígsludagur 14. ágúst 2009, kl. 15:00

Föstudaginn 14. ágúst 2009, kl. 15:00 verður vígt á Djúpavogi listaverkið „Eggin í Gleðivík“. Vígslustaður verður austan við húsnæði fyrrum fiskimjölsverksmiðju í Gleðivík, en þar er verkið staðsett.            

Höfundur verksins er Sigurður Guðmundsson, einn af þekktustu myndlistar-mönnum okkar Íslendinga, en hann dvelur hluta úr ári hverju hér á Djúpavogi.

Öllum íbúum sveitarfélagsins er hér með boðið á vígsluathöfnina.

 Dagskrá vígslunnar er eftirfarandi;

1. Setningarávarp frá fulltrúa sveitarfélagsins.
2. Samantekt ferða- og menningarmálafulltrúa Djúpavogshrepps. Þar  verða m.a. rifjuð upp atriði er komu fram í kynningarbæklingi sveitarfélagsins um „Eggin í Gleðivík“ s.l. vor. Einnig verða veittar upplýsingar um þá sem styrkt hafa verkið í einni eða annarri mynd.
3. Ávarp frá Signýju Ormarsdóttur, menningarfulltrúa Austurlands
4. Ávarp listamannsins, Sigurður Guðmundssonar, sem jafnframt afhjúpar verkið.
5. Að lokum verður grillveisla við „bræðsluvegginn“ ef veður leyfir.

Sveitarstjórn Djúpavogshrepps

Hér fyrir neðan má sjá kynningarbækling um eggin í Gleðivík, unninn af ferða- og menningarmálafulltrúa Djúpavogshrepps og sveitarstjóra Djúpavogshrepps.

Smellið hér til að skoða hann

Vegna töluverðrar eftirspurnar í notkun á fjarfundabúnaði í skólanum eru þeir sem hafa áhuga á að nýta sér hann í vetur beðnir um að hafa samband við skólastjóra grunnskólans sem fyrst þannig að hægt verði að raða niður tímum í hann og skipuleggja vetrarstarfið.  HDH

Sveitarstjórinn og vefstjórinn sátu ekki auðum höndum í gær, heldur nýttu góðviðrið og sumarfríið til þess að mála þakið hjá þeim síðarnefnda, í fagurrauðum kommúnistalit. Það má velta því fyrir sér hvort nágranninn á móti hafi haft eitthvað um litarvalið að segja.

Eins og sjá má á myndunum er samvinnan góð og munda þeir penslana af mikilli fagmennsku.

Undirrituð átti leið fram hjá vinnufélögunum og stóðst ekki mátið að smella af nokkrum myndum. Líklegt þykir að þó nokkur eftirspurn myndist eftir slíku málarateymi um leið og myndirnar birtast hér á netinu, enda slíkir menn ekki á hverju strái.

BR

Hafþór og Óli á þakinu

Vinnufélagarnir vinna vel saman

Nú er töluvert um liðið frá því að fluttar voru síðast fréttir af besta golfara sem Austurland hefur átt í kvennaflokki þ.e. Ástu Birnu Magnúsdóttur frá Djúpavogi.  Það sem er nýjast að frétta af Ástu Birnu er að hún varð í þriðja sæti í höggleik á Íslandsmótinu og svo kórónaði hún góðan árangur með því að verða Íslandsmeistari í sveitakeppni kvenna með Golfklúbbnum Keili nú fyrir skemmstu.  Það er því deginum ljósara að Ásta Birna er þegar búin að festa sig í sessi sem einn af bestu golfurum landsins.  Við óskum Ástu innilegar til hamingju með þennan frábæra árangur.  AS

Ásta Birna Magnúsdóttir önnur frá vinstri