6 verkefni úr Djúpavogshreppi hlutu styrk

6 verkefni úr Djúpavogshreppi hlutu styrk

Uppbyggingarsjóður Austurlands úthlutaði í gær rúmum sextíu milljónum í 61 verkefni. Þetta er í fimmta sinn sem úthlutað er úr sjóðnum sem hefur það hlutverk að styrkja menningar- og nýsköpunar- og atvinnuþróunarverkefni sem falla að Sóknaráætlun Austurlands.

Í heildina bárust til sjóðsins 116 umsóknir. Sjóðsstjórn ákvað í ár að styrkja færri verkefni í ár en í fyrra en þau sem urðu fyrir valinu fengu hærri upphæðir.

6 verkefni úr Djúpavogshreppi hlutu styrk að þessu sinni en alls var úthlutað 60,316 milljónum í 61 verkefni. Af þeim voru 30 á sviði menningarmála og fengu þau 27,9 milljónir en 25 á sviði atvinnuþróunar sem fengu 24 milljónir. Að auki voru veittar 8,2 milljónir til stofn- og rekstrarstyrkja á sviði menningar.

Að þessu sinni var sérstaklega kallað eftir verkefnum sem tengdust mataruppbyggingu og matarmenningu. Styrki hlutu 13 verkefni sem vinna að nýsköpun í matvælaframleiðslu. 3 af þeim komu frá Djúpavogshreppi en þá styrki hlutu matarupplifunarferðamennska Adventura ehf, Pála Geirsdóttir til þróunar á Gröfnum þorski hjá Goðanesi og William Óðinn Lefever til stofnunar fyrirtækisins Lefever sauce co sem framleiðir hot-sauce sósur í Berufirði.

Einnig hlutu styrki Svavar Pétur Eysteinsson fyrir Sumar í Havarí og Djúpavogshreppur hlaut styrki fyrir samtímalistasýninguna Rúllandi snjóbolti/12 og Miðstöð Cittaslow á Íslandi.

Styrkir Uppbyggingarsjóðs Austurlands 2019